皇馬半場速食馬拉加

猪拉多纳

施丹掌舵霸氣返晒嚟

今晚西甲馬德里雙雄分途出擊，皇馬要作客馬拉加，而同市死敵馬體會主場硬撼維拉利爾。皇馬自從上個月委任施丹執掌球隊後，全面復甦，尤其攻力變得非常穩定，兌現當初話大踢進攻足球嘅承諾，C朗連續兩仗入世界波，信心爆棚，近6仗聯賽5度半場領先，今仗有力延續「速食」強勢，一於捧半場客勝提早收錢。

（now 632周日晚11時直播）
C朗撻着連轟世界波

自從施丹上任後，「銀河艦隊」無論內部氣氛抑或球員狀態均有明顯好轉，就算「大聖爺」加里夫巴利近期因傷缺陣，由占士洛迪古斯代替佢拍住C朗、賓施馬組成嘅新三叉戟，一樣無堅不摧。其中王牌C朗近兩仗對畢爾包及羅馬都轟入世界波，證明佢依家信心爆晒燈，加上眾將均願意為新帥賣命，成績自然大有改善，近6場西甲取得5勝1和兼狂轟23球，當中5仗更係換邊前已經領先對手，重拾昔日霸氣。

相反主隊馬拉加近況反覆難靠，取得2勝1和3負，加上近6次聯賽鬥皇馬1和5負，擺明畀對手食住，今場面對一開波即搶嘅「銀河艦隊」半場都好難頂。
維拉利爾讓客有「體」頭

至於次席馬體會則主場對「4哥」維拉利爾，今仗馬體會有後衞荷西基文尼斯坐波監，中場堤亞高文迪斯及奧古士圖費南迪斯仲養緊傷，讓唔起近6仗未輸過嘅「黃色潛艇」，一於捧維軍讓球客勝。

（now 632周一凌晨3時30分直播）