傷兵滿營炒唔起 曼聯弱細難得米

猪拉多纳

憑住上仗足總盃砌低梳士貝利，曼聯主帥尹戈爾又得以續命，繼續保住紅魔帥位，之不過球隊傷兵名單繼續加人，尹帥壓力有增無減。今晚「方丈」領軍出戰歐霸盃32強次回合，就算主場出擊睇怕都幾難數起力求死守嘅米迪蘭特，既然入球中位數升至2.5/3球，不妨捧1.95倍入球細仲實際。

（now670台周五凌晨4:05直播）
米迪蘭特硬淨未驚過

曼聯喺首回合作客以1:2敗走丹麥，呢鋪回師奧脫福主場想出線自然要焗攻對手。之但係紅魔今季主場火力麻麻，近12次喺奧脫福球場比賽，食咗6場白果咁多，而且只有1次可以攻入對手3球。更大鑊係球隊再有球員受傷，包括近5仗入3粒嘅翼鋒連格，同埋前鋒威爾堅尼打柴，加上射手朗尼、中場費蘭尼未好番，令本身攻力唔算出色嘅紅魔，進一步降低數胡能力。

何況米迪蘭特自從上仗反勝曼聯，親身了解對手級數後，班球員都話唔再驚紅魔。爭出線信心大增，加上呢班波近況唔差，連續6場比賽不敗，今仗刻意泊大巴的話，曼聯都咪話唔頭痕喎。