亞冠盃輪換9件 浦和睇重日職大葉

猪拉多纳

已經兩年冇喺日職交過手嘅浦和紅鑽同磐田山葉，今日响埼玉世界盃球場「重逢」，上周中喺亞冠收起幾件主力嘅浦和，似乎決意爭奪今季日職冠軍，主場對住剛啱由日乙回升嘅磐田，2.02倍「讓球主勝」抵博。

（開賽時間：周日下午1:00）

球季剛剛開波，按道理傷病唔多又唔係疲態畢露，好少球會玩輪換呢家嘢，偏偏浦和就以呢兩個禮拜啲波太密為理由，响上周中作客南韓對浦項制鐵輸0:1場波，收起中場宇賀神友彌、柏木陽介、關根貴大、前鋒李忠成幾個，落場陣容同上星期聯賽2:1贏柏雷素爾場波比較，出現咗成9個變動，你話佢哋選擇放棄亞冠咩？目前言之尚早，但係重視日職就係肯定嘅事。
磐田山葉新升班材料有限

其實浦和今季放走咗啲老將同用唔着嘅球員，補入長澤和輝、駒井善成同達藤航幾件生力軍之後，兵源厚咗，公認屬於爭霸分子之一，側重日職一啲都唔奇。況且佢哋喺2013年4月以前，20次主場迎戰磐田攞到12勝2和6負，勝率達到6成，拉勻場均仲入到1.6球，今場波冇理由唔博「讓球主勝」，個2.5/3球嘅1.7倍入球大，唔嫌熱都可以做埋投X次選添。

磐田呢支升班球隊班底唔差，但又講唔上頂班，上星期主場0:1輸畀名古屋鯨魚，反映出佢哋最多只係中游分子嘅材料，唯一亮點係波蘭門神卡斯托夫卡明斯基好穩健，鯨魚全場射咗磐田17次只入1粒，真係靠佢嘅本事。今日作客浦和，磐田應該自己知自己事盡量穩守，尤其前鋒保夫萊特嘅復出，令佢哋反擊本錢大增，更加疊埋心水玩死守啦。
浦和搶W賀柏木陽介大婚

但係浦和除咗實力高半班，今季升格做10號仔嘅柏木陽介上星期五宣布婚訊，同TBS主播佐藤渚拉埋天窗，成班隊友都要賀佢，有理由唔攞呢3分當人情啫，磐田想守得住都好難。