皇馬揸住2球照屠雌「狼」

猪拉多纳

主場火力猛唔hea踢

皇家馬德里歐聯開殺戒！今晚歐聯16強展開次回合賽事，皇馬主場迎戰羅馬大有機會上演一場大屠殺。「銀河艦隊」首回合作客已經領先2:0，不過佢哋喺巴拿貝球場出擊從來唔會hea踢，大勇C朗為提升自己嘅入球數更加會搏盡，「雌狼」為反勝晉級焗攻，隨時死得仲慘，1.95倍「讓球主勝」冇甩拖。

（有線61、64、201、203及中央５台周三凌晨3:45直播）
巴拿貝出擊 近6仗入27球

皇馬首回合作客都贏2粒，晉級機會真係好大，不過「銀河艦隊」球迷一向要求高，有時連C朗都會被柴台，施丹帥位未坐暖，當然要把握每場比賽，爭勝提高民望啦！皇馬自施丹領軍後大舉進攻旗幟，近6場主場喪入27球，平均每場入超過4球，啱啱西甲就大炒切爾達7:1，加里夫巴利傷愈復出都有1球進帳，主場火力勁到得人驚。
羅馬歐聯作客喪失波

另一邊廂，羅馬1月由史巴列堤接手領軍後成績回勇，近8場賽事只係首回合輸過畀皇馬，其餘7場意甲全勝，事實上，佢哋依家喺意甲爭標形勢相當唔錯，球員注意力好明顯已經擺喺聯賽上面，今場嚟到巴拿貝球場只係盡力而為，羅馬如果恃住近期入波多玩主攻，似乎慘敗機會仲大。

羅馬防守能力認真麻麻，當中歐聯分組賽3場作客失咗13球，包括作客魯營球場1:6慘敗喺另一支西甲豪門巴塞隆拿腳下。記得上季羅馬喺歐聯亦曾經以1:7輸畀拜仁慕尼黑，證明佢哋同歐洲頂尖勁旅仲有大段距離，今場再成屠殺戰嘅悲情主角都唔出奇。