亞冠「紅魔對決」！ 廣州 紅鑽「大」有睇頭

猪拉多纳

亞冠盃今日爆發「紅魔對決」！被形容為「亞洲紅魔」嘅中超勁旅FC廣州（廣州恒大淘寶），今晚响H組第3戰，主場迎擊「日本紅魔」浦和紅鑽，呢兩隊波交手甚少悶場，1.72倍入球大玩得過。

（now672台周三晚7:30直播）

可能同英超曼聯一樣畀人叫紅魔啩，恒大、浦和今季表現麻麻，大家開咧踢咗5場波，恒大响中超、中超盃同亞冠只得2勝1和2負，浦和喺日職、亞冠都叫做好啲，都只係3勝2負，開局唔係咁順，尤其亞冠盟主恒大喺H組兩戰1和1負包尾，更加令人跌晒眼鏡，今晚佢哋Win唔出嘅話，小組出線都好成問題，唔輪到佢哋唔搏。
廣州兵疲易失波

由於非勝不可，恒大賽前推出嘅官方海報，主題係「上下同欲者勝」，希望激勵班人同心合力全取3分。假如從實力同地利角度去講，恒大贏浦和把握比較大，但係呢支上屆冠軍因為舊年年底要踢世冠盃，收咧遲咗變咗開操時間不足，班球員仲未進入狀態，而且主帥史高拉利近兩個禮拜都唔肯玩輪換，批主將8日內轉戰大陸、澳洲兩地，未上力先有疲態，對住準備用速度制勝嘅浦和，難保後防唔失波，呢啲環境博入球大正路。
亞冠盃賽制

現為分組賽階段，32隊分為8組，每組4隊，採聯賽雙循環制，每組首名及次名出線16強。