5連勝弗到震畢爾包再O趙華倫

猪拉多纳

歐霸盃16強「西班牙內訌」次回合，首回合領先1球嘅畢爾包，今晚會造訪華倫西亞。畢爾包近5仗贏晒狀態正處於巔峰，相反華倫西亞3連敗對士氣影響甚大，加上上月聯賽主場對畢爾包竟慘吞3蛋，華倫今仗落後下焗攻隨時得不償失，平手盤度士撐客軍畢爾包。

（now 670周五凌晨2時直播）
華倫3連敗 加利佬冇晒計

華倫西亞自前曼聯後衞加利尼維利執教後表現持續不振，上周喺「打吡戰」更輸埋畀利雲特，球隊已經連輸3場只係入到1球，可以話係「攻不銳，守不穩」，而「加利佬」似乎完全諗唔到計點幫球隊重返正軌。華倫上仗首回合作客畢爾包，最終以0比1落敗，落後1球回師主場其實係有能力收復失地，但以佢哋近期嘅表現，加上今仗有主力射手卓利舒夫因傷踢唔到，實在畀唔到度士信心去支持佢哋。

至於畢爾包近況真係弗到震，球隊近5仗贏晒之餘仲只係失咗兩球，防線可以話係非常穩健。畢爾包除咗防守勁之外，進攻亦「交到貨」，球隊前線主力好似沙賓馬連奴、魯爾加西亞同阿度里斯近期頻頻有「士哥」，狀態甚弗，今仗要攻破華倫西亞大門絕非難事。值得一提嘅係，畢爾包2月尾作客華倫西亞曾大勝3比0，今仗再造訪米斯泰拿球場心理上自然有優勢，度士估計畢爾包應該坐和望贏，平手盤值得支持。