熱刺決心贏晒上盤尼料

猪拉多纳

英超二哥熱刺今晚主場迎戰般尼茅夫，熱刺上周中於歐霸盃喺半力出擊之下畀多蒙特踢出局，餘下球季可專心聯賽爭標。般尼茅夫連贏3場護級壓力大減，搶分決心不及主隊，熱刺讓一球捧上盤。

（now 622周一凌晨零時直播）

熱刺現時落後李斯特城排第二，可以話係近年最有機會拎英超冠軍嘅一季，領隊普捷天奴一直視此為最大目標，故此歐霸盃多數以副選落場，剛周中佢哋喺16強次回合主場輸畀多蒙特1比2，總比數輸1比5畢業可謂「如願以償」。上仗歐霸盃休息嘅射手哈利卡尼今仗如無意外會復任正選攻堅，呢位英格蘭國腳上場聯賽對阿士東維拉梅開二度，今季英超已入咗19球，佢除咗要幫熱刺繼續追趕榜首李斯特城，自己亦要同「狐狸」射手占美華迪爭奪神射手以及國家隊嘅正選前鋒位置，應會盡力喺般尼茅夫身上爭取士哥。
般茅接近上岸未必搏

般尼茅夫近期狀態唔錯，聯賽連贏修咸頓、紐卡素及史雲斯，踢完30輪聯賽已有38分，同一般被視為護級安全線嘅40分只差2分，護級壓力大減，佢哋今季首循環主場對熱刺大敗1比5，級數明顯差一截，熱刺讓一球上盤值博。