紐卡素 新特蘭大駁火

猪拉多纳

英超「東北打吡」紐卡素主場對新特蘭，雙方今仗唔止為面子而戰，更關乎1億鎊（約11億港元）經濟利益！兩隊現時都深受降班威脅，若然降班無緣下季英超，將面臨損失1億鎊電視轉播收入，重要程度拍得住歐聯決賽。如果今場打和一齊失分，等同「雙輸」，因此兩軍焗攻搶分之下，有利製造入球，一於捧大盤。（now622周日晚9時30分直播）

英超護級形勢開始清晰，包尾阿士東維拉已經九死一生，另外2個降班位置，估計不外乎新特蘭、諾域治、紐卡素。排尾二嘅「喜鵲」紐卡素早前由賓尼迪斯接手執教後，首仗作客僅0比1不敵榜首李斯特城，雖敗不辱，有助振奮士氣。事實上，「肥賓」大賽經驗豐富，以往不乏以「救火隊長」姿態現身，取得不俗成績，包括12／13年球季中途執教車路士，捧歐霸盃冠軍。
「黑貓」近況好作客照攻

紐卡素踢完對李斯特城之後，餘下9場聯賽，仲要鬥曼城、利物浦同熱刺，搶分有難度，因此面對其他對手，更加要爭取贏波，尤其係今場護級「6分波」，絕對不容有失，賓尼迪斯首度領軍主場出擊，應會擺大個頭主攻，做齣好戲。

新特蘭只係領先紐卡素1分，但球隊狀態唔錯，近5仗取得1勝3和1負，包括擊敗曼聯，打和利物浦，可見搶分護級鬥心非常強。同埋「黑貓」近年一直食住「喜鵲」，雙方近6次對賽，新特蘭取得全勝，包括3場作客。因此，新特蘭今仗到訪聖占士公園球場，都未驚過，實行同主隊鬥攻大駁火。