巴塞勢不可擋再沉潛艇

猪拉多纳

較早開波嘅另一場西甲，由兩支喺上周中歐洲賽成功過關嘅球隊對碰，排第4嘅維拉利爾主場迎戰榜首巴塞隆拿。巴塞近年往績食住維拉利爾，加上「地上最強」希望盡快鎖定聯賽冠軍，又較「黃色潛艇」多一日休息時間，作客有力再次擊沉對手，讓球主客和巴塞讓一球，當然捧讓球客勝。

（now 632周日晚11時直播）
維拉利爾體力輸蝕

巴塞隆拿剛喺上周中歐聯16強次回合主場以3比1輕取英超阿仙奴，目前狀態大勇。「地上最強」近7次同維拉利爾交手錄得全勝，而且近3次對賽都能淨勝對手兩球或以上，明顯係格食格。巴塞喺聯賽表現強勢，已經連贏12場，球隊目標係盡早封王留力爭西盃同歐聯，今仗搶W唔會手軟。

至於維拉利爾近期走勢回落，已連續3場聯賽未贏過，球隊由於要兼顧歐霸盃賽事，喺兵源不足嘅情況下，自然難以全力應付聯賽。雖然兩軍上周中都要應付歐洲賽，但相比留守主場嘅巴塞，「黃色潛艇」要遠征德國，而且又少一日休息時間，體力明顯較輸蝕，加上中場莊拿芬杜斯山度士仍在養傷，而門將艾路拿、中堅梅沙基奧及查美哥斯達亦上陣成疑，今仗主場出擊隨時大敗而回，一於捧讓球客勝。