阿根廷復仇「智」珠在握

猪拉多纳

潘帕斯雄鷹精銳盡出

聽朝舉行嘅南美洲世盃外圍賽，將會上演美洲國家盃決賽翻版戲碼，由應屆美洲盃盟主智利主場迎戰亞軍阿根廷。「潘帕斯雄鷹」喺今屆世盃外頭4仗，因為球王美斯缺陣只曾1勝，搞到球隊喺南美洲區積分榜排第6，需要加緊搶分出線。而且阿根廷舊年喺美洲國家盃決賽不敵智利屈居亞軍，令美斯繼續背負「無冕球王」污名，如今美斯傷愈歸來，為清算新仇舊恨激戰可期，呢鋪仲要撞正智利人腳不整，阿根廷讓平半照撐2.04倍上盤。

（開賽時間：周五早上7:30）

阿根廷喺今屆世盃外頭4仗1勝2和1負，4仗全開入球細，很大程度跟美斯、阿古路多次缺陣有關。之不過今次就唔同講法，皆因「潘帕斯雄鷹」今次點兵精銳盡出，除美斯外，一對箭頭阿古路、希古恩、Fit爆天使迪馬利亞等星級球員均有入選，就算中場柏斯托尼、馬斯真蘭奴今仗唔踢得，實力仍然有保證。

更何況班波上年飲恨美洲盃決賽，搞到美斯連續2年喺世盃、美洲盃冇得捧盃，呢鋪仇人見面仲唔搏盡報番一箭之仇咩？咪忘記射手希古恩同翼鋒迪馬利亞呢排Fit到漏，前者喺意甲射入29球、後者喺歐聯16強兩鬥車路士均交出助攻，協助球隊淘汰對手。考慮埋「潘帕斯雄鷹」5日後先返主場鬥弱旅玻利維亞，今仗實在毋須刻意留力，誓要全取3分。
智利狀態走樣陣容殘

對手智利自從贏得美洲國家盃之後，表現未能保持強勢，對上2仗外圍賽分別主場打和哥倫比亞1:1，以及作客慘敗烏拉圭0:3，演出可謂走晒樣。更大鑊係球隊今場陣容嚴重不整，中場包爾斯亞、守將干沙路查拉落選，前鋒伊度亞度華加斯、中場維達爾、佐治華維迪亞齊齊坐波監，3線都唔齊章，呢鋪主帥比斯幾難唔頭痕。以班波近5次主場鬥阿根廷有3次要食白果嘅情況嚟睇，呢鋪想要搶番分真係談何容易。