5大名牌王者預演

猪拉多纳

今夏歐國盃決賽周嘅5大名牌：德國、意大利、英格蘭、葡萄牙及比利時今晚一齊出擊，上演「最強對陣」超激熱身賽！5路大軍球星如雲，正面交鋒為今夏決賽周大戰預演，到底邊隊最有冠軍相，可以一次過睇晒！

今晚熱身賽矚目大戰，兩支各奪4屆世盃冠軍嘅豪強硬撼，德國主場鬥意大利，「日耳曼兵團」德國自14年捧世盃後，表現明顯走下坡，踢熱身賽尤其差勁，包括上仗主場被英格蘭絕殺，令人失望。反觀意大利堪稱德國剋星，踏入千禧年後6次對德國取得3勝3和，今仗仲有得受讓，必捧意大利讓球客勝。

（無綫翡翠台、TVB13周三凌晨2時45分直播）
日耳曼兵團失飢渴感

德國嘅世界排名已由第1跌至第4，講到尾因為領隊勒夫食老本，只照顧昔日功臣，仲用緊普多斯基及馬里奧高美斯等高峰已過嘅心腹。但對史浩克門將費文、中場利萊辛尼、史特加中場迪達維、慕遜加柏中場史甸度、賀芬咸前鋒禾蘭及哈化柏林新星米素爾韋沙等一班喺德甲表現出色嘅新勢力，視若無睹，呢班後起之秀始終無緣入選。由於德國一班常規國腳已贏過世盃，登上球員生涯頂鋒，爭勝飢渴感大不如前，上仗領先英格蘭兩球，最後都反輸2比3，昔日「日耳曼精神」蕩然無存，遇上老對手兼剋星意大利，恐怕佔唔到甜頭。

意大利上仗熱身賽，壓住上屆歐國盃盟主西班牙來打，最終被逼和1比1，但已贏盡口碑。「藍衫軍」喺干地率領下充滿朝氣，恩斯治尼、艾沙拉維、施蒙尼沙薩等「90後」新血已成功接班，活力同狀態兼備。同埋意大利一直剋死德國，06年世盃4強加時淘汰主辦國德國，上屆歐國盃4強，再以2比1清脆擊敗德軍。單計近4次熱身賽交手，意大利亦取得2勝2和，今仗有力保住不敗，讓球客勝抵捧。