童話成真今晚睇李

猪拉多纳

英超爭霸之路接近尾聲，領先次席熱刺7分嘅李斯特城今晚作客曼聯，如果「狐狸」能夠順利贏波，就可以歷史性首奪英超錦標創造童話！不過啱啱躋身足總盃決賽嘅曼聯，亦要搶分爭入前四，今晚仲要主場出擊，點會咁順攤。預料兩隊會齊齊合演一場「入球騷」，2.05倍嘅入球大絕對值得支持！

（now 621周日晚9時05分直播）
華Dee續缺 照做「大」騷

當全世界諗住李斯特城冇咗射手占美華迪坐鎮，睇死佢地「臨尾香」之際，神奇「狐狸」就用行動證明畀你哋睇，足球比賽唔係踢一個人嘅，而係講求Team Work！就算冇咗華Dee，都可以贏波兼做大騷。「狐狸」上場憑荷西烏路亞梅開二度，加上艾拜頓同埋馬列斯各入一粒，最終以4比0大炒史篤城，全取3分，分數上進一步拋離熱刺，如果今晚能夠擊敗曼聯，就可以提早奪取歷史性嘅第一個英超錦標，創造球壇神話，今場佢哋嘅動力無限大，相信成班球員一定會On fire去到盡！
曼聯氣勢勁 鬥攻爭前四

另邊廂，位列第5嘅曼聯落後第4位嘅阿仙奴5分，要爭入前四嘅話，餘下賽事不容有失。好彩曼聯最近狀態大勇，佢地剛剛於足總盃準決賽憑門神迪基亞救出12碼，以及安東尼馬迪爾喺補時絕殺，以2比1淘汰愛華頓闖入決賽，而對手只不過係水晶宮，捧盃機會相對較大。返到嚟聯賽，相信佢哋可以乘住近期氣勢，踢番場爭氣波。曼聯要搶分爭入前四；李斯特城要締造封王歷史，兩隊各有任務，相信佢哋今晚會攜手上演一場入球騷，2.05倍嘅入球大絕對係信心之選。