北愛守細波圍困白俄

猪拉多纳

另一場熱身賽，北愛爾蘭主場對白俄羅斯，首次打入歐國盃決賽周嘅北愛爾蘭，同一般異軍突起球隊一樣，都係靠防守起家，陣中最具名氣球員都集中防線，包括西布朗孖寶莊尼伊雲斯、麥奧尼，加上曼聯新星麥尼亞，頂得兩咀。更何況北愛近10場熱身賽每場總入球都唔超過2球，呢場波再追入球細。

（TVB 301周六凌晨2時45分直播）

北愛爾蘭可以創造歷史，首次進身歐國盃決賽周，皆因領隊奧尼爾擅長使用穩守突擊戰術，尤其係後防有幾位英超兵助陣，守得夠穩陣，10場歐國盃外圍賽只失8球，仲少過世界盃冠軍德國。

至於入波重任交晒畀伯明翰前鋒拉菲迪，呢位身高1米93嘅長人喺外圍賽攻入7球，佔北愛總入球近一半，反映球隊踢法好單調，導致入波數字偏低。北愛踢熱身賽亦一樣沉悶，以中位數2.5球計，近10場熱身賽都開入球細，細盤的確好路。
白俄羅斯熱身賽旺0:0

至於白俄羅斯冇份踢歐國盃決賽周，今場純粹陪太子讀書，戰意唔慌高。同埋呢支東歐球隊出名攻力差，10場歐國盃外圍賽只入8球，近4場熱身賽更有3場打和0比0，遇上同樣鋒力不濟嘅北愛爾蘭，隨時又悶和。