熱身賽之王 比利時攞高芬

猪拉多纳

另一場國際熱身賽，世界排名第2嘅比利時主場迎戰芬蘭。比利時堪稱熱身賽之王，近9仗「拍跳」錄得8勝1負佳績，當中包括擊敗法國、意大利等勁旅，日前亦以2比1反勝瑞士， 可見「歐洲紅魔」為備戰歐國盃非常積極。其中今季於車仔態沉嘅比利時王牌夏薩特，季尾表現已好轉，加上身邊有盧卡古、奇雲迪布尼、梅頓斯等進攻好手，炒得起4連敗嘅弱旅芬蘭，捧讓球主勝。

（now632、TVB 13周四凌晨2時45分直播）
近9仗熱身賽8勝

比利時處於「黃金時代」，早前更曾歷史性升上世界排名第1，呢支「歐洲紅魔」人才濟濟，夏薩特、奇雲迪布尼、盧卡古、迪比利、費蘭尼，以至門將泰拔高圖爾斯等主力，分別效力英超各大豪門，卡士十足。由於猛將如雲，內部位置競爭亦非常激烈，所以即使踢熱身賽，眾星都要出真功夫，以免被踢出國家隊。難怪比利時近9場熱身賽贏咗8場，包括2比0輕取瑞典，4比3擊敗法國，贏意大利3比1，今仗遇上芬蘭，大勝冇難度。
芬蘭陪練心態難捱

芬蘭大部分球員效力於德國、瑞典、挪威、俄羅斯等中小型球會，質素唔可以同比利時相提並論。佢哋喺歐國盃外圍賽10戰只有3勝3和4負，未能進身決賽周，所以今場對佢哋而言，只係陪人練波，備戰心態唔及比利時認真。加上芬蘭近4場熱身賽全敗，共失11球，兼冇波入，大敗唔奇。