三獅兵大啖（口趙）葡萄

猪拉多纳

今晚國際熱身賽重頭戲，由英格蘭主場對葡萄牙。英格蘭啱啱落實23人大軍名單，鋒線大把人用，哈利卡尼、占美華迪及處子戰即有波入嘅「福仔」拉舒福特，個個都弗到震，主帥鶴臣必定借今仗揀定邊個兩個前鋒喺決賽周擔正，不過「三獅兵團」防線唔多穩陣，近4仗「拍跳」都有失波，令呢4仗場均總入球有3球或以上，今仗中位數2.5球，2.23倍大盤有計。

（周五凌晨2時45分開賽）

英格蘭領隊鶴臣今次徵召曼聯18歲新星拉舒福特，原意只係畀佢跟操吸取經驗，冇打算選佢參加歐國盃決賽周，不過「福仔」上仗喺自己英軍處子戰同澳洲「拍跳」，開賽135秒就射入1球，助英格蘭贏2比1，表現獲激讚，正所謂好運好過好波，「福仔」咁鬼旺，令鶴臣決定徵召佢踢歐國盃。
史杜列治搏命爭正選

睇埋英軍今次大軍名單，除咗拉舒福特之外，前鋒仲有哈利卡尼、占美華迪、朗尼及史杜列治等射手，朗尼貴為隊長一定打正選，只係鶴臣或會畀佢改打中場，而鋒線兩個正選席位，就由其他4人去爭，鶴臣面臨「幸福的煩惱」。
葡萄牙冇C朗一樣多波入

「哈利仔」及華迪於之前熱身賽頻頻建功，狀態都弗，「史獨」好番冇耐，更加要喺「拍跳」爭取表現，要撕開葡萄牙防線並不困難。不過英格蘭防線人腳偏弱，3位中堅之中，基斯史摩寧經常犯錯，史東斯欠缺經驗，僅得加利卡希爾較可靠，恐怕「三獅兵團」難保清白之身。

葡萄牙王牌基斯坦奴朗拿度因剛踢完歐聯決賽，今仗獲得免役，但仍有拿尼、摩天奴、哥利斯馬及艾達盧比斯等進攻好手。拿尼在3月對勁旅比利時射入1球，助葡萄牙贏2比1，哥利斯馬日前喺熱身賽贏挪威3粒又轟入世界波，難得「大佬」C朗唔出，佢哋必定趁機騷哥利，隨時同「三獅兵團」合演入球騷，大盤不容錯過。