阿蘇唔掂冇板斧烏拉圭和味濃

猪拉多纳

美洲國家盃C組第2輪聽朝展開，開波前被視為爭標熱門嘅烏拉圭，首仗分組賽就落筆打三更，以1比3輸畀墨西哥，球員士氣同信心大受打擊，喺蘇亞雷斯未知出唔出得下，前景令人擔心。對手委內瑞拉暫時有3分在手，今場和波亦冇壞，好大機會玩守勢波，3.5倍和波好分頭諗得過。

（now 650周五早上7時30分直播）

上場睇到烏拉圭喺蘇亞雷斯缺陣之下，進攻毫無板斧，卡雲尼孤軍作戰易被嘜死，蘇亞雷斯雖然經已復操，但仍限於「無球練習」，除非佢嘅傷勢突然急速好轉，否則落場機會唔大。就算頂硬上勉強披甲，狀態夠唔夠亦屬疑問。烏拉圭上仗連最強嘅防守亦多次出現漏洞，實在難予球迷信心。
近4交鋒3次開和

委內瑞拉首仗1比0小勝牙買加，今仗面對同組牌面最強嘅烏拉圭，就算和波亦係理想賽果，所以今仗極可能穩守求1分。事實上委內瑞拉近4次同烏拉圭交鋒，有3次都可以同對手平分秋色，證明兩隊實力分野並唔係咁大，今仗博和局係明智之選。