將帥倒戈黑貓反咬拖肥糖

猪拉多纳

周一深夜英超獨腳戲，由「黑貓」新特蘭主場迎戰「拖肥糖」愛華頓。新特蘭主帥莫耶斯曾經喺愛華頓有過光輝日子，佢喺轉會窗關閉前簽入曾經喺「拖肥糖」合作嘅前鋒安尼捷比，兩人今仗倒戈肯定希望顯身價，阿謙捧受讓嘅新特蘭讓球主勝。

（Now 621及樂視體育周二凌晨3時直播）

新特蘭主帥莫耶斯過去曾經喺愛華頓有過唔錯嘅時光，更被欽點為「費格遜接班人」入主曼聯，可惜在紅魔未能交出好成績，更被嘲諷為「莫天才」，其後遠走西甲皇家蘇斯達亦未能交到貨。新特蘭季前有主帥艾拿戴斯出任英格蘭國家隊領隊，因而搵嚟莫耶斯執教，其實莫帥教中游球隊嘅能力唔錯，「黑貓」開咧後雖然只得1和2負嘅成績，但表現唔算太差，為免再被捲入護級漩渦，主場出擊係時候搶分。莫耶斯喺轉會窗關閉前，簽入自由身嘅前鋒安尼捷比，兩人曾經喺愛華頓共事，再次合作應可擦出火花；而老將迪科爾首3仗入2球，更以145球打入英超歷史射手榜前10，狀態大勇下有望攻破「拖肥糖」大門。
盧卡古轉會唔成冇戰意

愛華頓喺新帥朗奴高文帶領下，首3仗聯賽取得2勝1和表現亮眼，但今仗有中場占士麥卡菲因傷要休養3星期，對球隊影響唔少。另一個問題係，整個夏天鬧轉會嘅比利時箭頭盧卡古，最終唔能夠走人，佢仲有冇心為「拖肥糖」賣命實屬疑問。至於愛華頓造訪新特蘭主場光明球場嘅戰績亦唔係太好，近4次交手只得1勝1和2負，今仗作客讓波實在有啲過分，阿謙推介新特蘭讓球主勝。