波蘭細盤嗒得杯洛

猪拉多纳

太公波輪換 羅拔仔休息

今晚賽事安排唔多，推介以熱身賽為主，比較有睇頭係波蘭主場對斯洛文尼亞。論人腳波蘭質素較高，但要留意佢哋剛踢完世盃外圍賽，領隊拿華加可能輪換，畀羅拔利雲度夫斯基等主力休息，亦可趁機試陣，爭勝決心成疑。斯洛文尼亞近年青黃不接，仲要靠37歲老將路華高域數胡，攻力唔慌好，寧願揀中位數2.5球入球細。

（周二凌晨3時45分開賽，馬會網上文字直播）

波蘭上仗世盃外圍賽大勝羅馬尼亞3比0，不過有兩球出現喺最後8分鐘，由羅拔利雲度夫斯基射入；呢位拜仁慕尼黑射手喺比賽中被球迷用煙花掟中，今場大條道理可以申請「休息」。事實上，領隊拿華加亦唔想用殘呢位鎮山之寶，無關痛癢嘅熱身賽將佢收起，亦好合情合理。況且周末各大聯賽又重開，其他主力今仗都未必去盡，以免影響球會賽事。
英法U21大駁火

斯洛文尼亞上仗世盃外圍賽小勝馬爾他1比0，近3仗只入2球，但成功保住冇失波，明顯守強攻弱。由於主力射手路華高域年事已高，主帥卡坦歷今次召入施高斯克、迪贊查高夫斯基、迪拿美亞米拿等小將，試陣味濃，難攻入波蘭大門，一於要細盤。

另外，「三獅兵團」英格蘭明晚鬥西班牙之前，「幼獅」英格蘭U21今晚率先登場，作客法國U21踢熱身賽。由於英格蘭U21主帥修夫基去咗帶領大國腳，依家由艾迪保夫萊特暫時領軍，但表現唔差，上仗熱身賽以3比2反勝意大利U21。法國U21有巴黎聖日耳門孖寶桑奧古斯甸、拉比奧特，火力唔差，首選入球大。另一場U21熱身賽，意大利U21有多位主力缺陣，包括射手杜文尼高貝拉迪養傷，一對中堅魯加尼、阿利斯奧羅馬洛尼被大國腳徵召，人腳不整，捧丹麥U21為妙。