皇馬世冠登場大陣仗

猪拉多纳

金球先生領軍轟阿美利加

世冠盃4強焦點之戰，皇家馬德里勁爆登場，喺日本橫濱國際綜合競技場，出戰墨西哥球隊CF阿美利加！皇馬剛以35場創下球隊史上最長不敗紀錄，陣中巨星C朗又贏埋金球獎，氣勢銳不可當。特別係C朗上仗西甲獲輪休，養精蓄銳，今仗正好趁機「騷哥利」盡情數胡，畀世人見識「金球先生」嘅厲害。不過皇馬防線唔穩，而且CF阿美利加經過上仗半準決賽「熱身」，較早適應環境，有力取得入球，首選中位數3.5球嘅入球大。

（有線61及201台周四晚6時30分直播）

皇馬曾於2014年奪得世冠盃，教練施丹球員時代亦分別為祖雲達斯及皇馬喺日本捧過洲際盃（世冠盃前身），所以佢好重視今屆賽事，上仗西甲寧願冒住失分風險，都要收起C朗、賓施馬，目的就係為留力今仗搏殺。呢兩位射手身負重任，當然唔可以令施丹及球迷失望，勢必使出真工夫。

尤其係新鮮出爐嘅金球獎得主C朗，更加要證明自己獲獎實至名歸，點都應該入波顯身價。值得一提，過去8屆世冠盃4強，歐洲代表至少都能攻入對手3球，當中有5次總入球達4球或以上，包括兩年前皇馬以4比0大炒另一支墨西哥球隊藍十字，「銀河艦隊」今仗肯定唔會留手。
皇馬近6仗場場失波

CF阿美利加上仗半準決賽，憑射手施維奧羅美路下半場發威，個人連入2球，反勝全北汽車2比1，球員好有鬥心，即使今仗遇上豪門皇馬，相信都唔會坐以待斃。事實上，皇馬防守一向欠佳，近6場比賽都有失波，加上中堅沙治奧拉莫斯感到不適缺陣，CF阿美利加可以破蛋都唔出奇。同埋4強一戰定生死，任何一方先失波，都會豁出去一搏求反勝，有利合演入球騷。