C朗孭飛3連勝入16球 葡萄牙遇福星匈有成竹

猪拉多纳

世界盃外圍賽歐洲區B組上演「雙牙對決」，葡萄牙主場迎戰匈牙利，兩隊上年歐國盃分組賽打和3比3，時移世易，貴為歐國盃盟主嘅葡萄牙愈戰愈勇，近3場世盃外全勝，共轟入16球。反觀，匈牙利跌Watt，加上近2次作客葡萄牙，同樣吞3蛋而回，今仗凶多吉少，「讓球主客和」葡萄牙讓一球，可直取讓球主勝。

（有線61及201台周日凌晨3時45分直播）

葡萄牙上年可以捧歐國盃冠軍，最後1場分組賽鬥匈牙利非常關鍵，當時葡軍3度落後下，全靠王牌C朗梅開二度，驚險逼和3比3出線，然後一路殺入決賽，先至成功擺脫大賽「二奶命」歷史性封王，匈牙利可以話係變成咗葡萄牙嘅「福星」，葡軍今場未踢已先贏信心。事實上，葡萄牙近2次大賽外圍賽主場對匈牙利都大勝3比0，亦證明球隊應付呢支老對手的確有計。

其次葡萄牙今屆首場外圍賽，因為C朗缺陣而作客0比2不敵瑞士，但呢位皇馬巨星復出後，近3場世盃外全勝，攻入16球，C朗射入其中7球，可見只要有佢助陣，葡萄牙立即火力全開，匈牙利招架唔住。由於歐洲區只有小組首名可以直接出線決賽周，葡萄牙落後榜首瑞士3分，今仗不容再失，必全力爭勝。
匈牙利實力狀態都差

至於匈牙利上次可以打和葡萄牙，皆因對手狀態欠佳，其實佢哋一向欺善怕惡，包括歐國盃吞比利時4蛋，世盃外亦曾主場2比3不敵瑞士，甚至作客同弱旅法羅群島打和0比0，較早前熱身賽0比2輸畀瑞典，實力同狀態都曳爆，根本鬥唔過正值大勇嘅葡萄牙，匈牙利今場淨輸兩球或以上好正路。