洪禮賢講馬：千江映月匆出為乜﹖

魑魅魍魉

　　 啱啱果期賽事的確係奇景，除了全晚由華將擸晒8場頭馬之外，居然柏寶同韋達1W都冇，季內此景象有冇出現過都好懷疑﹖﹗唔好計當晚兩個坐騎實力如何，純粹睇過去的佔有率，至此二人加埋贏了152場頭馬，而總場次剛去到604場，計一計佢哋頭馬總和，佔總數約25%（如果唔計上期，百分點更高），即係每4場就有1W落入是但1個手上，可見密度幾緊要。突然開出一期圍骰，相信呢次可能會呈現大手交易的情況，因初步望吓佢哋嘅坐騎，韋達好似有三四駒贏得，柏寶則削少少，但有一兩匹比較突出就冇走雞。點都好啦，二人俱騎足11場，數量多即機會多，邊有可能又出現圍骰的局面﹗

　　望落今期賽事，第九場三班1400米嘅「千江映月」，應該好有決心，事關上個禮拜六先跑完，隔了1日即刻報名，季內未試過出得咁急，練者忽然「步速」加快為乜﹖唔係想補鑊，唔通想短時間又衰多鑊﹖﹗

賴維銘上仗騎法遭告誡

　　坦白說，上場「千江映月」如果唔係直路塞到嗌晒救命，贏唔贏唔敢講，但一席位置應該走唔甩，因為成條直路，騎者做得最多嘅動作唔係推策，反而係勒避及收慢。而賽後小組都忍唔住告誡賴維銘﹕「尤其是跑過五百米，移至「好有勝」內側的決定已引起注意，日後應確保盡量以能夠取位望空的方法策騎。」睇完大家應解讀得好清楚，亦引伸到騎者今場在沿途攞位會醒目，此外，按剛仗直路際遇唔好，兼1鞭都冇打過，依然撲得咁勁，至少證明本身唔係冇狀態，除非匆出體力不夠，若不，話晒之前贏過「鎗臣」、「超群如意」等馬，卡士在此邊會輸蝕畀任何對手。