馮諾嘉手記：C欄抽靚檔好旺財W得

魑魅魍魉

　　周三晚八場賽事全部由華將贏晒，本地薑可以話係威番鋪，而最令人感到意外嘅係法國五月盃嗰場，大冷門「卡加大師」獨贏有成73倍，條Q差啲就派成三千蚊，雖然賽果冷到震，但贏馬過程亦精采。

　　當晚另一位華將賴維銘同樣犀利，從騎以嚟首度中三元，呢次佢一定要多謝白德民，皆因三場頭馬當中有兩場嚟自大摩馬房，分別係「勁勇士」同「桃李滿門」，雖然前駒上場都係由賴維銘經手，但後駒一向由白德民操刀，假如白德民唔係去咗新加坡克蘭芝馬場，為「鳥語花香」備戰國際短途錦標，留喺香港嘅話呢場頭馬應該冇走雞，阿賴有咁好身手，遇到大摩主帥缺陣時當然要大打身價波，因為佢都希望日後獲大摩重用﹗

　　講番周日初步心水，第五場四班1800米，「好旺財」近三仗全入位，其中兩場只係輸短頭同頸位，未能贏馬欠多少運氣，上仗同程擺前跑，終點前一步先至畀「滿高」越過，今次跑田草C+3欄，內檔馬較為着數，「好旺財」不但強配柏寶，仲抽埋一檔，可期輕鬆貼欄放頭或前置，負磅又輕，形勢造就下，呢匹董事馬係時候贏番場交代。

科研精英高水準亞軍

　　第八場三班泥地1200米，角逐九龍木球會百周年紀念盃，「科研精英」至今出賽四場唔贏都有位置，頭兩場跑田草1000米都跑第三，之後初試泥地1200米，即刻以兩個幾馬位大熱輕勝，由頭放到尾無馬能敵，上場再戰同程遇上「盈彩繽紛」，對手係不敗之師，「科研精英」敗喺佢蹄下，絕對係不足為辱，何況「盈彩繽紛」再出再贏，可見「科研精英」呢一席第二亦唔嘢小，因為佢都拋離第三名嘅「勁飛馳」近兩個馬位，今次強敵已去，可期補中兼捧盃。