洪禮賢講馬：多得普萊西唔少

魑魅魍魉

　　周三夜賽有時落住大雨嚟跑，賽道草地表面濕滑，的確危險處處，所以有些騎師在陣上會較謹慎，如轉直路彎時唔會一湧而上、盡量與同場其他馬保持安全距離等等，這是人知常情，作為馬迷的你與我，不容過分苛求，始終人命最緊要，小心駛得萬年船嘛。當然，若是天朗氣清，陣上冇事冇幹都無故手部緊促，就抵鬧有餘﹗

陣上拼勁過人

　　不過，有人錫身，又唔代表冇人唔會唔要命咁搏馬，就以普萊西為例，嘩，佢騎「易搏贏」嘅狠狼法，近排在陣中真係好少見。當時喺嗰啲位，基本上畀大部分騎師都會揪停，或是唔騎住，撇開「旺家多寶」點阻佢，以及如何內閃嚴重，其實「易搏贏」夾在中間，該處嘅橫身位真係未必夠1隻馬過（其實再之前已擯開「追月」在先），騎者被撞後有膽撬番開，過程之中僅停止催騎動作1步而已，那份幹勁及應變意識，唔係人人可做到得到。雖然1W過後，未能為佢帶來即時得益，呢次都係得7匹馬騎，不過騎開嘅「多贏勁駒」，今場唔係冇機會，或可喼住有馬贏。

　　「多贏勁駒」之前有揀開，但到上場放棄，當時諗住除罩和縮程好似唔對路，兼且短時間由1800米轉到1400米，可能會唔適應，但出來的賽果說明了現狀，原來1600、1800米都唔係最啱，目前應以此程最有殺傷力。實在剛仗應該有Q，如非直路頭段要花時間內移，未能早點撻行後勁，按佢最後幾步的衝刺力，「友利多」根本唔係佢手腳﹔今場A欄一定更啱追（唯一擔心今場前中段未必快），就算周日有雨亦唔會對佢有影響，假假哋在外地跑變化地未甩過前列名次，有埋咁好鬥志嘅騎師幫手，追得過。