馮諾嘉手記：步步穩 目標清晰

魑魅魍魉

　　今日係端午節，上晝到沙田睇完扒龍舟後，下晝仲可以入埋馬場睇跑馬，其中第九場係精英盃，呢場本地三級賽1400米，唔少馬房都精英盡出，大摩同蔡約翰各自有三匹馬列陣，似乎都志在必得，大摩今季頻頻捧盃，佢旗下三駒之中，愈戰愈勇嘅「步步穩」最值得睇好，放棄遠征日本安田紀念賽，目標當然係呢場！

長春樹跑2000啱晒

　　精選場次第三場四班2000米，用「長春樹」做膽，前場已喺田草1800米跑近，只輸半個馬位，證實有足夠長力，上場則跑田草1600米，排外檔沿途走三叠而後上不及，只輸四分三馬位跑第二，今次跑2000米啱晒，隨時開齋。配腳先揀「勁好友」，近三仗都喺谷草2200米入位，係呢場最有長力根據嘅馬，馬未開齋，實好鬥志。「電訊高星」連續兩場喺谷草入位，今次回師田草謀突破，但對手唔弱，拖腳。冷腳吼「卓爾不凡」，上場喺谷草一哩跑近，回勇要防。

　　第八場三班1200米，「川河勁駒」上場初出已大勝對手三個幾馬位，賽後被加成十五分，就知評磅員睇重，超級馬上三班依然好惡，做膽。配腳方面，「人人興旺」海外戰績出色，早前試大閘走勢亦吸引，預計會有分頭，首選作配。「蜚聲」至今四戰不勝有位，今次初戴眼罩，或有好大幫助，配腳要拖。「高一線」初出兩仗雖然未上名，但係都跑得好接近，已連番試準。

　　第十場三班1400米，柏寶近期頻頻搏失，「闊袍大袖」亦係其中一匹，其實前次喺柏寶胯下跑田草1200米，後上追入第三走勢已好吸引，上場原庄人馬再戰，慢閘下後追跑第六，究竟係鞍上人發揮定係馬匹狀態嘅問題？今次增程跑1400米兼改配普萊西，一定要追埋呢鋪。配腳方面，「傑出君子」上場喺大雨中跑黏軟地，兼排外檔仍可以後上跑第二，只以四分三馬位輸畀「松風」，劣勢下有咁好表現，今場升班孭輕磅，拖腳首選。「國寶」至今五戰唔贏都有位置，演出準繩，唔可以捨棄。後備補出嘅「千江映月」曾經喺同程贏馬，近仗落敗亦輸唔遠，亦要兼顧。