洪禮賢講馬：再來風3檔執到寶

魑魅魍魉

　　記憶之中，由兩位騎師單日各贏4W，此情景真係好少好少見到，反而個人1日贏5W或以上又唔係冇，摩加利、馬佳善、韋達、戴圖理等等，呢類例子遠近都有。或者近十年八載，都係由韋達雄霸騎師榜，所以來到今季，競爭比較激烈之下，睇到格外過癮。姑勿論到最後誰勝誰負，作為馬迷的你與我，都係一件好事，起碼睇到他們那分競逐的心態，作為是但一方的擁躉，唔會睇到心淡，總好過二人提早「舉手」﹗

　　事關有一年（唔記得邊兩個練馬師），練榜冠軍由兩人瓜分，在煞科前他們的頭馬數目一樣，來到所謂終極一戰，外界以為會鬥到尾（因當日二人俱有機會唔錯的上陣馬），點知佢哋皆捧蛋收場，整個happy ending出嚟，真係事有湊巧嘞﹗﹖

　　來到今期日馬，一跑親谷草，焦點自不然落在柏寶身上（季內勝出率仍喼到20%以上），加上爭緊冠軍，而呢次出馬質與量俱備，似乎大手交易的機會唔細，而睇落第四場「再來風」（圖），或會係纜躉之一。當然，隻馬今季跑咗11場，仍然未贏到，唔慌叻咗去，之但係，借助今場的檔位形勢，或是出頭黃金機會吧。始終好早期已經想教呢匹馬留力，但稟性難移，硬係唔多教得好，頂多係冇從前咁搶口，未能完全將之轉型，因此才左右了成就。但見前仗同程，因有好檔輔助，一早泊到好位，拉士有本事與「威威財星」叮噹馬頭返嚟，並可拋甩季軍幾個身位，賽績幾養眼。引伸到今場，佢在3檔起步，內側兩駒唔見得快過佢，隨時出現前仗的賽事形勢，苟如是，畀佢沿途守到靚位，末段要過番佢就唔易嘞。