韋達一嘢被拍賣打沉神仙難救！

魑魅魍魉

每逢季尾倒數，韋達喺騎師榜多數已帶甩成條街，但今季就出現戲劇性轉變，季初韋達出閘大脫腳，曾經被柏寶拋離16場，雖然其後亦步亦趨，但早前停賽4日，冠軍形勢岌岌可危。不過柏寶冇好好把握呢個大幅拋離宿敵嘅餐士，而韋達復出後連環數胡，上周三端午節一戰雙方更打成4比 4平手。正當眾人以為今屆冠軍之爭未到最後一刻難料鹿死誰手之際，剛戰谷草日賽，柏寶打出歷來最漂亮一仗，破紀錄地取得一日6W，幾乎已可篤定登上冠軍寶座。馬季只剩六次賽事，柏寶拋離9W，即使韋達有蔡約翰撐腰，睇怕亦神仙難救！
       
騎練本來秤高啲韋達

今屆冠軍騎師寶座最終花落誰家，最心水清莫過於一班行內嘅騎練，其中騎師方面，早前幾乎一面倒都睇好韋達可以第十度蟬聯冠軍騎師寶座。其實早就喺韋達被罰停賽四日嗰時，仲落後緊柏寶七場頭馬，唔少騎師已表示韋達要做冠軍騎師問題不大，如果有得投注冠軍騎師呢個彩池，必定買番注韋達咁話。不過，當他們親身目睹柏寶剛周日谷戰的精彩演出後，肯定感受到此位澳洲高手爭冠軍的決心以及一股銳不可當的煞氣，即使韋達有蔡約翰幫手，亦難攖其鋒，唯一慶幸沒有冠軍騎師呢個彩池，否則他們的投注肯定凍過水。
       

練馬師方面，同韋達合作開嘅黃汝安，曾表示冠軍騎師應該都係韋達嘅囊中物，但柏寶戰意好頑強，奮力抵抗之中竟然能夠激發一日六捷的創舉，對韋達而言猶如一潑冷水照頭淋。
       
朱先生

李易達：隨時停賽衰收尾
       
黎先生

雖然現時冠軍之爭似乎已成定局，但李易達就唔係咁睇，佢話馬季依家仲有六次賽事，仲有好多事情可以發生，假如是但一個唔小心被罰停賽，就已經可以同冠軍講再見，世事無絕對，所以未去到最尾都唔知邊個贏。
       
袁先生

馬迷：係時候改朝換代

朱先生：「喺我心目中，柏寶嘅騎功絕不比韋達差，不過多年來佢都只能屈居韋達之下，非常戥佢唔抵。畢竟韋達已連續九年壟斷冠軍騎師寶座，應該收夠籌，相信係時候退位讓賢，畀柏寶一嘗做冠軍嘅滋味。」

黎先生：「我對柏寶永不放棄嘅精神非常欣賞，佢陣上嘅策騎好少受到質疑，全因畀人肯搏馬嘅形象，直路經常見佢起勢推騎打鞭，就算最後輸咗，買咗嘅馬迷都會服氣啲，所以佢會比韋達較獲得馬迷嘅歡心，難得佢今季咁大餐士，當然想佢贏。」

袁先生：「韋達早前被罰停賽四日對佢今季爭冠軍造成好大影響，如果唔係應該早就反先咗。話晒柏寶依家仲head住9場，而馬季只剩番六次賽事，睇怕佢早就部署好，喺餘下賽事作出奮力抵抗，韋達可以追嘅空間實在唔多。」