射手對辦侯斯頓強爆邁亞密

港陌

29/06/2010
文： 朱楓

正所謂物極必反，近況奇差嘅侯斯頓戴拿模，聽朝喺美聯盃主場迎戰FC邁亞密，相信係時候反彈，事關射手程拜仁傷愈復出後狀態回勇，呢場仲唔搵甲組仔邁亞密出氣咩？「讓球主勝」有1.95倍絕對值捧！（開賽時間：周三早上8:30）


西岸勁旅侯斯頓戴拿模近況低沉，日前主場同科羅拉多急流打和2:2後，已經連續4場不勝，好彩喺4月加盟嘅前鋒尼雲耶終於開齋，射入追平2:2一球。大家咪睇小呢位津巴布韋國腳，事關佢曾經喺08年被奇連士文邀請去拜仁試腳，實力有番咁上下，加埋老牌射手程拜仁傷愈復出後近4 場入2粒，有呢對利箭掛帥，對住甲組仔可謂綽綽有餘。

FC邁亞密甲組都踢唔掂

FC邁亞密嚟自低美職一個級別嘅甲組，雖然曾經有前巴西球星仙奴同羅馬里奧踢過，弊在近年都喺下游徘徊，今季亦唔例外，暫時係12隊波排第10，最近8場更只得1勝，睇怕今場作客戴拿模都係凶多吉少。

美聯盃賽制

賽事以一場過分勝負，若法定時間內打成平手，則需加時作賽，再和則以互射12碼決勝。