韋拿要超越魯爾做No.1

港陌

29/06/2010

對智利嘅決賽周入球最遠紀錄突然被推翻，又點會打擊到西班牙王牌射手韋拿嘅無比鬥志？相比起呢位巴塞隆拿前鋒童年嘅艱苦經歷，由幾乎殘廢嘅鄉村小子，搖身一變成為今日嘅球壇巨星，小小挫折絕對唔會摧毀到佢成為歐國盃、世盃雙料冠軍，以及超越魯爾成為西班牙史上第一射手嘅夢想。


韋拿喺對智利之戰以一記40碼（即36.576米）笠射空門震撼全球，一度以為寫下世盃決賽周史上最遠入球紀錄，不過，事後經過國際足協查證，呢記入波途程其實仍不及由前中國隊荷蘭籍領隊阿里漢，喺78年世盃荷蘭2:1擊敗意大利中嘅40米入球。雖然挑戰最遠入球紀錄失敗，但韋拿總算喺決賽周累積6個入波，一舉超越包括布達堅奴、希亞路、摩連迪斯同魯爾等前輩，成為西班牙世盃決賽周史上歷來入波最多球員。

4歲骨折練成神奇左腳

現年28歲嘅韋拿成名之路充滿傳奇，喺西班牙北部一條小村莊出生嘅佢，細細個就遭逢意外右邊股骨骨折，幾乎以後連行路都唔得。好彩，喺佢父親荷西韋拿嘅悉心照料下，韋拿繼後奇迹復原。韋拿更大爆佢隻神奇左腳都係因此練成：「嗰陣我只得4歲，右腳仲戴住個保護支架，爸爸當時會不斷向我拋波，逼我學習用左腳踢波。」


14歲嘅韋拿相當反叛，曾經因為同教練不和搞到被雪藏，差啲從此同足球絕緣，多得爸爸嘅鼓勵，佢先重新投入足球。喺希杭出身，輾轉効力過薩拉戈薩同華倫西亞，直到世盃之前，佢更以4,000萬歐元（約3.8億港元）身價轉投巴塞隆拿，踏上球員生涯高峰。

昔日鄉下仔變巴塞球星

08年以4個入球協助西班牙贏得歐國盃冠軍，自己亦成為神射手，韋拿當然希望再下一城：「創造歷史的確令我感到光榮同開心，但國家隊贏得冠軍始終較我入波更重要。」雖然口口聲聲以國家為重，但現時以61戰入41球，喺西班牙史上神射手排名僅次44球魯爾嘅佢，始終都想成為最佳：「我希望可以超越魯爾，用入波幫國家隊贏得更多錦標。」