C朗辣火頭短訊「騷擾」拉莫斯

港陌

29/06/2010

葡西大戰未動腳先動口？葡萄牙喺16強硬撼西班牙，西班牙後衞沙治奧拉莫斯賽前就畀皇馬隊友、葡軍隊長C 朗發動SMS「騷擾」，話今場贏梗，沙治奧拉莫斯就反擊佢話唔好自欺欺人，兩人實行要响大戰前嚟番場SMS牙骹戰！

還擊「唔好自己呃自己」

其實C 朗同沙治奧拉莫斯老友鬼鬼，平時喺皇馬都成日一齊玩，不過今次就各為其主，要喺場上決雌雄。一向爛玩嘅C 朗就先撩起火頭，整咗個SMS畀老死：「遇到葡萄牙，你哋都算唔好彩，唔使對勝利有乜幻想！」沙治奧拉莫斯收到「騷擾」當然不甘示弱，回敬佢話：「唔好玩喇，你咪喺度自己呃自己！」


除咗C 朗，沙治奧拉莫斯同葡萄牙另一球員比比都算係Friend，佢喺一次訪問時亦講笑話好「同情」佢哋：「C 朗同比比真慘，估唔到咁快就出局。」