新一代重心查維馬天尼斯

港陌

29/06/2010

查維馬天尼斯上位可期！西班牙中場沙比阿朗素大有機會缺席「雙牙大戰」，領隊迪保斯基就講明會畀21歲小將查維馬天尼斯打正選，亦意味法比加斯同大衞施華仍然要做後備。睇嚟大受賞識嘅查維馬天尼斯，今場要好好把握呢個機會證明自己喇！

力壓法比加斯踢正選

呢個効力畢爾包嘅小將，最初入選世界盃大軍都令好多人大跌眼鏡，但事實上佢喺今次比賽嘅表現又確係唔錯，迪保斯基更大讚佢前途無可限量：「我對查維馬天尼斯好有信心，應該會係西班牙未來幾年嘅重心人物。」對於有望打正選，查維馬天尼斯就話隨時Ready：「只要有需要，我隨時可上陣，我會盡全力證明自己。」


佢亦話嚟緊面對葡萄牙係硬仗，絕對唔可以輕敵：「葡萄牙唔係只踢C 朗1個，球隊整體戰鬥力好強，前中後三線人腳實力平均。」