洪禮賢講馬：開心自在條件好番

魑魅魍魉

　　唔係賣廣告，因為已經出晒新聞稿嘞﹗由即日起，參加者只須在馬會指定渠道成功登記，便有機會於田戰煞科日到沙田馬場領取iPhone機套。該iPhone機套設計係咪精緻，以及具代表性﹖大家可能有唔同意見。然而，但凡設計及篩選名單，總會順得哥嚟失嫂意，你覺得Ａ的作品靚，可能我認為Ｂ的更佳，至於那10匹經典名駒綵衣，有冇遺漏更會存在分歧。

馬會推廣夠潮抵讚

　　但阿賢只係知道呢次嘅贈品唔再普通，起碼係貼身得多。唔係話自己用緊iPhone，就話今次贈品好呀，只要四圍睇睇，身邊有幾多人用緊 iPhone，便會知普及性去到咩層次，就連3歲半的小女，對於iPhone的操作也不是一知半解。所以，呢期推廣的確至潮，抵讚﹗此外，如果要從這方向入手，馬會應該增加多點Apps，因為在iPhone App store上搜尋（HKJC），目前只找到那個「虎年運程」，似乎唔夠噃﹖﹗

　　賽事進入最後5期，真真正正係倒數階段，騎師形勢好唔平衡，應該話係近年之中，最單調的一季……正式兩公婆見鬼（唔係你就係我），睇番對上3 期，韋達贏了10W，柏寶亦然。先係16/6一人4W，跟住再出現1﹕6及5﹕0及的局面，嘩，佢哋兩個頭馬的佔有率大得過分，但話雖如此，相信嚟緊5 期，局勢依然咁上下。

　　講番周四賽事，第三場1200米「開心自在」，前仗有本事打抵「旅英駿駒」，當然唔簡單（該役後駒的發力點過早也是關鍵），而上賽好明顯因地慢影響，加上，騎者為要避泥頭而貼欄，直路又遲遲始擺正軚，多與少有礙表現﹔今場回到正常場地，對手既不多，兼且預期步速唔慢利後追，條件好番晒。