借題發揮：鷸蚌相爭 漁人得利

魑魅魍魉

　　正當大家仍然把焦點落在冠軍騎師之爭嘅時候，唔知有冇留意挨近呢幾期，除了例牌嘅柏寶或韋達有得威之外，一再有三兩位仁兄有着落，譬如馬偉昌、普萊西及潘頓，而究竟係揀錯馬、人情推唔甩，還是咩原因，佢哋3個有啲頭馬，往往同柏、韋好有關連，正正因兩巨頭喺手指罅漏出，通常啲頭馬都幾好分，唔通係鷸蚌相爭，漁人得利。所以，如果捉到1隻呢類W，好過買中7 次「盈彩繽紛」啦？！

手指罅漏出冷W

　　事實上，馬、普、潘三人，呢排又真係喼住有馬贏，如馬偉昌對上兩期3W，普萊西再之前兩期夾埋3W，而潘頓仲啱啱4W。咁，又睇吓當中佢哋憑啲咩馬攞到成績，例如潘頓剛剛爆隻「迎風起舞」，賽前曾由韋達試大閘；普萊西新近勝出嘅「風火神駒」及「金堡龍華」，原本都係柏寶騎開；而阿昌上月尾憑「歡歡樂樂」入Q（對上嗰次柏寶騎），結果阿寶騎同場大熱WP「騰雲駕霧」冇三甲。

　　筆者向來冇陰謀論呢支歌唱，亦唔多喜歡以呢種方法揀馬，但如果係有實力，無故畀人放棄，出現高水的值博率則作別論。而呢期類似嘅馬有一堆，像第五場「陽飛駒」、第八場「金獅威將」及第十場「闊袍大袖」等，雖然唔係隻隻冷門，都未至於冇肉食，平注買W，中1 隻應夠本，如果連環扣到，唔會冇利錢。　

亨利