洪禮賢講馬：擦身而過的彩金

魑魅魍魉

　　不得不承認，近日的確愁眉不展，人大了，對事物的睇法已不如年青時，多了感觸，生活上添加不少無形的困惑，再多的情緒控制，偶爾也不易克服心理的障礙，始終身處此地，若有留意新聞， 一樁又一樁的禍事，豈容視而不見，當作冇事發生。

　　尚記得曾經看過一位馬壇才子的文章，內容大意係指馬場唔係你最黑！真係發人深省。

　　坦白講， 作為投注人，除非戰無不勝，若不，必然面對過失敗的經歷，當中如何曲折？離奇成點？可以話要幾多有幾多，要幾「出」就有幾「出」。所以，買馬唔中，根本唔係咩大件事。

　　像上季尾田草煞科，與一位行家齊齊離場，佢話買中第八場6號「金獅威將」獨贏，有10倍回報，筆者當時正想恭喜佢之際，佢話填錯飛，明明獨贏買 3K，收番3萬幾，殊不知填錯咗第九場6號，佢懵到當「金獅威將」衝線之時，仲喺度Yeah，點知轉頭望番張飛一對之下，忟死咁滯（最終第九場6號包尾），心情直插谷底。

馬場遭遇曲折離奇

　　究竟呢位行家係咪最黑，一定唔會，或許你與我在綠茵場上所經歷過的遭遇，比他曲折多倍（筆者兩度試過幾十萬六環彩欠一關，而嗰關嘅馬跑第三）。何況佢只係輸錢，沒有賠上性命，最多暑假期間冇得去外地旅行，到9月5日又係一條好漢了，而相比起呢兩日的禍事，呢單簡直比粒沙仲細好多。感恩吧，可幸仍在凡塵。

洪禮賢 馬會賽馬節目主持