閒話一句：方嘉柏搏 開心動力

魑魅魍魉

　　季初場地向來偏硬，像開鑼戰賽前連日倒水般下雨， 但有三數小時歇歇，即跑出好至快地時間來，純跑一股直路衝刺力者，爭吓位置可以，要贏馬實在非易事。這次移師跑馬地，更加作如是觀，懶理佢用邊條欄。

　　第三場論弗非「開心動力」莫屬，上月底試泥地閘，順跟至300米見柏寶輕輕示意，立即便展步加速撲前，無怪復課已經不再快跳，日日收埋內圈踱步儲火。記得去季末贏「最佳孖寶」一役，其餘前列馬「清風送爽」、「三和之星」亦處大勇境界，「開心動力」負131磅也贏到無得跑，這場跨季W十九無甩拖，方嘉柏（圖）可繼開鑼日後再添頭馬進帳。

　　配腳可加入「風雲勇子」博分頭，早熱身落足心機撚，嘉年華閘見這匹韁口敏感的馬，能夠保持直線前進，嘉豪已經立即寫入筆記。昨晨跳來仍有點口勁，不過是慢跳半哩則可接受。以其去季插班次仗即接近走勢作藍本，有進步即應防。

　　第四場選膽頗傷腦筋，曾經想過用埋門狀態起得好的「龍子」，但此廐馬季初總是失望多於驚喜，加上勞愛德騎得「巧」的馬，用硬功馬偉昌總怕格格不入。

康樂名駒備戰積極

　　結果決定用「康樂名駒」，這匹一度捲入淘汰漩渦的馬女，復課見一直保持身光頸靚，縱使並未借大閘提升進度，但工夫做得勤而見一課比一課好。我心目中牠純跑大步均速，1800 米比此程好，2200 米則又比1800米理想，但諗深一層多數將據守好位，而白德民發揮亦應較卓利硬淨。不求可勝，純謀一席！