馬主論戰

港陌

鵬力洋洋強項起筷

　　開鑼日賽果正路，今次轉跑谷草，唔知賽果又會點？

　　今晚鍾意兩匹馬，先講第六場「鵬力洋洋」，上季初搏嚟搏去都贏唔到，但三月轉跑谷草一哩即輕鬆開齋， 證明此程威力好強，今次季內初出即報跑呢程，點睇都係搏命格。

　　另外，尾場呂廐「輕輕鬆鬆」亦都有留意價值，上季初出已幾乎響谷草1200米贏馬，證明窄場性能掂，今次跑1000米抽到一檔起步，坐位望贏。

張敬山

哈哈妙隨時反彈

　　睇見八歲馬「酒勝」響開鑼日爆冷贏馬，似乎「老馬利季初」呢句說話真係有道理，今次一於揀啲年長馬捧場，其中尾場九歲馬「哈哈妙」就幾啱心水。前季仲有兩W 落袋，反映戰鬥力未退化，上季積極部署減分，依家評63分，比上季初足足低咗18分， 計落已經有晒反彈空間，隨時出招。

　　另一匹老馬要吼頭場「領航動力」，九歲馬上季喜逢第二春， 睇嚟今季亦會搏盡。

任達華

家橋遇弱旅贏得

　　方嘉柏開鑼日捧盃兼起孖，搏殺手風大順，賭錢最緊要跟紅頂白，今晚一於繼續吼實佢手馬。最啱心水係頭場「家橋」，上季跑咗十三場只贏過一場，雖然勝出率唔高，但始終響四班贏過，今次對住一批實力參差嘅對手，已經可以秤高一線，用埋何澤堯減磅上陣，馬少場合話唔定可以畀佢一放而返。

　　另一匹要留意嘅方廐馬係「鎖定目標」，上季雖然全冇表現，但評分亦因此減咗唔少，小心今季一出即刻有表現。

寇鴻萍、梁廷鏘