好旺寶喜泣開齋

魑魅魍魉

俗語雖有云「養兵千日，用在一時」，但在急功的馬圈，竟有人願意花兩年多時間等待愛駒初次出賽，呢份耐性絕對難能可貴。但對於「好旺寶」嘅馬主黃清華夫婦嚟講，呢份耐性真係帶來回報，此匹六歲J布PPG來港近三季，至昨午才初出，結果喺頭場四班一千米直路賽配韋達以11倍勝出，同時為蔡約翰打開今季勝門，皇天不負有心人，黃太賽後更激動到眼泛淚光，場面非常感人。
       
六歲才初出的好旺寶，在韋達胯下按韁衝線，成為本季蔡廐第一匹頭馬。
傷蹄甲絞腸痧多波折

對於「好旺寶」一鳴驚人，黃生黃太坦言呢場頭馬得來不易，佢哋話愛駒喺澳洲嗰時遇到病毒，搞咗好耐先運港，而嚟到冇幾耐又喺行馬機時整親蹄甲，之後又試過絞腸痧，好彩蔡約翰好畀心機慢慢調理，卒之養番好隻馬。佢哋話「好旺寶」雖然咁多傷，但一直唔捨得畀隻馬退役，堅持與等待下終成正果，當然值得高興。依家只係想隻馬健康穩定，繼續出賽爭功；至於途程方面，遲啲應該跑千四、千六先啱腳法。