借題發揮：練馬最緊要有鬥心 徐雨石 愛拼者贏

猪拉多纳

　　潮流興咩，成日會變， 但喺馬場，有一樣嘢就永恆不變，就係鬥志嘞！如果抱住hea嘅心態，或者閃閃縮縮，唔冷嗰場唔搏，熱門就死火，成績唔會好，三兩季過到骨又點，中長線都係冇路行，所以，依家好多練馬師其實幾搏吓，唔理規模大定細，總之贏得就贏，當做生招牌嘛。好似石哥咁，出名好鬥志，季季如是，熱又係咁贏，冷門一樣爆得吓！譬如啱啱整隻熱辣辣「清新空氣」，但之前近40倍嘅「金紫荊」照贏可也，唔到我哋唔服。

　　好嘞，呢位鬥志咁好嘅練馬師，呢期又大批馬上陣，有冇機會贏番幾場，同佢預早慶祝生日呢（30號）？睇嚟機會都幾高，叫胡馬好似「愛拼者贏」、「中國心」。前駒啱啱贏完，雖然上番四班，對手冇咁水皮，話晒季初有態係惡啲，何況，比上賽孭輕17磅，唔係冇得揮；後駒上場表現稍為失望小小，跟好位之下，直路衝極唔上名，唔知係對手強，定係未夠狀態。咁呢次跑低半班，加上熱完身嘞，隨時返嚟。

Jack