高清睇跑馬：讚賞質高 升班照贏

猪拉多纳

　　「八發八中」上季尾連續三場於泥地賽上名，次次輸到離行離列，因此上仗季內初出縮程跑泥地1200米，閘前捧成兩倍大熱實在誇張，而信心十足果然有料到，早段吊住四、五位並走三叠，轉直路拉出外檔望空即交出極強加速力，最終以快時間大勝六個幾馬位，可見進步良多，賽後被加十一分便知受重視。今仗升班但對手非強，看來不存在任何阻力，負輕磅再爭泥地可再下一城。

　　另外，「讚賞」上季於總場次745初出跑谷草1000米，負於贏開的「常山鳳寶」跑第二，若非全程走二叠，未必會以四分三馬位見負，並且不要忘記，蹄下敗將「此時此刻」今季一出即輕鬆補中。

　　不過，「讚賞」亦不輸蝕，開鑼日轉戰田草1200米，該場賽前多數人睇好「錢照贏」，去到最後二百米，該駒亦遙遙領先，可說佔一面倒優勢，誰不知「讚賞」落後極多下後發先至，最終反勝半個馬位先抵終點；最吸引之處是馬匹曾內閃，鞍上人蔡明紹未能用鞭仍照贏，同時季殿軍「自由勝」及「多贏勁駒」接戰上名，由此可見「讚賞」質素之高，升班而臨一樣冇有怕。

Sam