賠率有路捉：寶樹友盈早飛硬淨

港陌

　　尾場二班1000米，掛頭牌「寶樹友盈」差不多年半冇頭馬見面， 仲要面對好多匹路程專家，例如「桃李滿門」、「孖寶神駒」等等，但係噚日早飛賣到WP大熱門，42蚊W，17蚊P 真係有啲始料不及，飛數比預期硬淨得多，好明顯有人唔擔心呢匹七歲仲要孭最重磅嘅馬，非常有把握可以坐位望贏哩。

　　第五場三班一哩，「賞蝦王」早飛獨贏七倍算有飛，位置更加成為大熱，只得15蚊，相信冇乜馬迷估計到。睇番呢隻馬不單未贏過，最長都只係跑過1400 米，根本未證明本身氣量，難明何方神聖咁有把握，一早WP落定墊底飛。

　　剛戰蔡約翰有隻「賞惑」用牌仔落飛得手，「賞蝦王」又係改用見習生，推算呢注飛嚟自有識之士，既然一早落定大大注墊底P，各位真係要小心呢注聰明錢呀。

　　騎師王方面，韋達同柏寶賠率相若，不過後者整體實力平均得多，「野馬」、「心路」、「好兄弟」、「當旺」及「威威財星」都坐位望贏，應該穩陣好多，廿幾蚊都捧得過。

周仲