朝早有動靜：活力奔騰再贏

魑魅魍魉

　　文家良馬房在今次賽事布下強陣，而且在晨課期間亦擺出高姿態，頻頻搵來柏寶、巫斯義兩大高手幫手仄馬，且親自在沙圈指揮各駒操練，課後又聽取鞍上人意見，屬季內少有鏡頭，看來練者對今戰高度重視。

文武維揚口勁收斂

　　昨朝所見，文家良仍與多位騎師不斷密斟，動態異常緊張。今晚快活谷八場賽事，文廐共有五駒出戰，全部皆有惡氣，小心大舉出擊。

　　多匹參戰馬當中，要留意列陣第三場四班1000米的「文武維揚」，此駒有型有款，經過上一場熱身之後，狀態更為出色，口勁收斂，收身上力。復課柏寶摸實不放手，態度極之積極，質新馬再爭谷中1000米，有力打開勝門。

　　踏入十月，蔡約翰馬房每戰都有馬贏，先在國慶日憑「活力奔騰」、「賞惑」起孖，繼而在10月6日憑「一路順風」贏馬，剛戰亦有「勁高手」勝出，攻勢可謂浪接浪。今晚蔡廐雖然僅派「活力奔騰」、「戰河」兩駒列陣，但兩駒實力不俗，尤其是前駒新勝猶勇，今番轉場隨時可再贏。昨朝所見，韋達一度在隧道口停低與蔡約翰傾談一輪，到收操後更相約一同入馬房，似有出擊大計，上述兩駒值得多加留意。

韋柏