楝悉先機：開心自在升值

猪拉多纳

　　今晚谷草C欄C+3彎賽事，毫無疑問，內檔馬好着數，實力馬排到好位更事半功倍，所以好多時喺谷草，中駟可勝上駟。由於呢種跑道模式恆久不變，就連我阿棟咁硬頸嘅，點都秤內檔馬高啲，外檔唔係叫大家咪掂，但注碼要識控制，明明想買一百，扣底五條，諗吓有邊啲內檔馬可吼仲好。

　　第二場四班1200米。「回鄉精神」明明今晚有1650米唔跑，與廐侶「日月暉華」在路程上調轉，邊匹會係主力，還是兩駒一齊搏，望完個排位，後駒已冇眼睇，執個11檔，想搏都冇得搏。但前駒1檔就唔同，兼且開跑中程，級數稍比此等對手優勝，如能克服縮程，有機會出頭。

　　第七場三班1200米。「開心自在」轉到方廐後，預料能力會有若干升值，既然在上手馬房已在三班勝出，目前分數仍有很多水位。此駒唞暑後準備程序充足，有試過大閘點都安心啲，只要畀佢遇到快步速，以佢嘅後勁咁強，邊有對手可以抵擋到！

　　第八場三班1650米。「生生不息」上季尾轉到文家良馬房，跨季跑兩場得1亞1殿，冇錯，係未贏到，但冇1場輸得多過條馬頸，除咗講句冇運，冇咩好講，但另一方面，完全體會到練者好想盡早交差。搏完上場繼續落力做準備，呢次轉返谷草一哩，路程冇問題，而對手就冇上場咁勁，點計都係有着數，希望有埋1檔，畀佢贏番場。

點買法

　　既然內檔馬好，冇理由叫大家博一堆排外檔嘅， 未跑已經凍過水啦！至於內檔一批心水，WP捧「回鄉精神」及「開心自在」。揀Q場次， 圍住內檔嗰幾場，好似第七場咁，「開心自在」5檔、「祥勝愛駒」2檔、「精靈勇駿」1 檔， 整條鐵三角Q 及QP，應該穩陣。

陳華棟