高清睇跑馬：帶旺來篤定連捷

博彩老头

　　「帶旺來」上季新馬賽小試牛刀已有出色表現，後追第五，有板有眼，最誇張跑出22.0超快末段時間，而且該戰季、殿軍「甜將」和「文武維揚」今季贏馬，前駒更贏兩場，可見是高水準賽事。

　　「帶旺來」今季做足工夫試閘大勝，上仗復出總場次68四班田草1200米，大熱贏馬意料之內，估唔到改用主動跑法，並非上季留前鬥後照贏，最厲害全程從容守在第二位，入直路後移出二叠望空，反應一絕有如撻行摩打，要留意當時鞍上人仍未推騎，稍後輕輕推送衝得更勁，因為一早知道穩操勝券，最後一百米再未有推騎，按韁凱旋而歸。周日升班仍然超級，三歲馬負輕磅十分好跑，贏面極大。

福智鬥心無比

　　「福智」來港前在澳洲九戰獲得三勝三位，戰績非常出色，包括在一場三歲馬二級賽跑入亞軍，不過來港開操後走勢一般，先後試過兩課大閘，第一課大力推騎跑第四，第二課雖然取得第三，不過輸十多個馬位，全無威脅，故此上仗初出總場次94二班田草1400米，備受忽視，尤其用並非馬房嫡系巫斯義，賠率冷落至45倍。

　　睇番整個過程更嚇一跳，出閘迅即留前鬥後，最弊一直內檔有馬匹，因而全程被頂出三叠蝕位，去到最後彎位更走出最外叠，難得全程蝕位極多，入直路依然交出強勁衝刺，仲要發揮無比鬥心，先後趕過「火箭動力」及「加州萬里」，接住拉士更後上擒下「飛銀動力」爆出冷W，周日再戰贏馬1400米，有力再報捷。

Sam