馬主論戰

猪拉多纳

智友穩食尾胡

　　谷草賽事向來係方嘉柏天下，今日方廐手馬都好惡，要贏兩、三場唔係難事，我就睇好方嘉柏可以包辦最尾嗰口孖寶。先講第九場「開心自在」，上場轉倉初出響谷草1200米跑第六，但實際只係輸個幾馬位，試準後今次再跑同程，睇怕可以交代。尾場「智友」上仗後追跑第二，走勢相當悅目，今次換巫斯義騎，求補中決心明顯，穩食尾胡。

張敬山

朝東之星q定掂

　　告東尼今日手馬分量十足，應該會有頭馬進帳。先推介第三場「朝東之星」，上季尾響谷草1800米開齋，證明有一定戰鬥力，轉去東廐後跑過三場冇表現，相信練者都心急交代，今次跑番谷草兼排一檔，要吼實。另外，同主嘅「讚賞」都有留意價值，上場轉去沙田跑二班賽，對手大幅增強，輸咗並唔出奇，今次落番三班應該會有唔同演出。

寇鴻萍、梁廷鏘

雨電風雷捧盃

　　今日有兩場盃賽舉行，其中第八場公益金盃，我睇好霍廐「雨電風雷」，上場響田草1600米開齋贏馬，雖然只係以頸位壓倒「較量」，但其實末段已收復咗好多失地，今次轉嚟谷草上陣，照計一樣啱發揮，有望捧盃而回。另一匹霍廐馬留意「聖樂邦」，上場跑一哩大敗，今次即刻加眼罩兼縮程跑1200米，話唔定會嚟個大變身。

任達華