數據人生：葉楚航唔做阿二

博彩老头

　　葉楚航開倉以來成績穩定，雖然上季勝出三十五場頭馬，較前季少十W，但總體表現已算及格。不過，截至剛戰為止，葉廐季內只贏四場，到底發生甚麼事？

　　根據資料顯示，除蘇保羅未開齋外，吳定強、梁定華、伍碧權及黃汝安均只贏得三場頭馬或以下，但此類華倉兵力不足，位處練馬師榜下游自然可理解，但葉楚航養馬量逾六十匹，數量拍得住方嘉柏、蔡約翰等大倉，但目前僅得四W，成績便令人大跌眼鏡。葉廐馬出名鬥志鮮明、冷熱皆拼，表現未如理想，實在跟運氣有莫大關連，事關季內此廐共得十六席亞軍，乃二十四個馬房中最多，而且不少均以短距離拼敗，若然運氣好一點，頭馬數字隨時早已達到雙位數。

勝任有餘收復失地

　　剛戰葉廐「雙龍出海」及「好辣椒」跑第二後，周三晚這個倉口雖只得四駒列正選，但當中不乏實力分子，而谷草場合最緊要排內檔，若然屆時有運地抽得內檔起步，相信練者係時候打破悶局。至於一眾報名馬中，筆者睇好「勝任有餘」可收復失地。此駒上季尾於谷草一哩取得三連捷，顯然窄場性能突出，而今季初出亦於同程大熱取勝，拋離亞軍「活力奔騰」逾兩個馬位，後駒之後三戰錄得冠亞殿各一，足證「勝任有餘」尚有評分在手。

　　上仗「勝任有餘」排九檔再爭谷草一哩，賠率不夠3倍足證信心十足，可惜負129磅下力追不及負122磅的「靚到爆」跑第二，但末段愈追愈勁，表現已令捧場客收貨。今戰增程至二班1800米，看腳法必合發揮，負磅大減，絕對有力補中。

歐陽志恆