連利精英第一鋪又贏

猪拉多纳

葉楚航同柏寶自從佢哋喺今年一月十三日攜手贏咗隻「三和之星」後，就冇再合作建功，航哥仲喺上季尾停止畀馬柏寶跑。到咗今季，航哥卒之有馬畀柏寶騎，之但係搏嚟搏去都差啲啲，直到尋日佢哋終於喺第九場三班千二米靠「連利精英」打破悶局，幫助柏寶喺停賽前執番W。航哥賽後就話「連利精英」跑新鮮感特佳，每季初出第一鋪例必有好表現，所以今次贏馬，佢都唔覺得意外。航哥仲爆響口，話喺啱啱嘅新西蘭Ready To Run兩歲馬拍賣會，原本想買番隻「連利精英」嘅細佬返嚟，可惜價錢唔夠人高，依家惟有贏番「連利精英」補數。