馬主論戰

港陌

雄爆換人要吼

　　馬偉昌今日啲坐騎實力唔曳，我睇好佢有馬贏，最啱心水係第四場「雄爆」，上場配蘇狄雄跑1400米慢閘，末段亦衝得唔係好順，最終返嚟跑第四，輸畀頭馬「辣得喜」唔夠一個馬位，表現好搶鏡。今次強配馬偉昌，應該可以贏番一場。

　　另外推介第三場「帶旺來」，上場早段同「輕輕鬆鬆」鬥燒輸咗，可以當冇跑過，今次換韋達會捧得過。

張敬山

活力奔騰轉場起筷

　　蔡約翰今日出馬唔少，當中有四駒交畀高雅志操刀，話唔定有頭馬在其中。先推介第六場「活力奔騰」，上場初跑谷草2200米都跑第三，只係輸畀頭馬「大紫荊」半個馬位，五歲馬仲有進步空間，今次轉場換韁繩一流嘅高雅志操刀，可以贏番一場。

　　另外第三場「一路順風」都要留意，上場轉跑泥地輸咗，賽績唔可以作準，今次跑番草地隨時有唔同演出。

寇鴻萍、梁廷鏘

陽明好好施冷箭

　　今日重頭戲其士盃，焦點落響「雅雪」同「加州萬里」身上，不過蔡廐隻「陽明好好」都唔可以忽視，前仗響谷草1200米贏馬，上場轉跑泥地 1200米，沿途走外叠都跑第五，表現絕對唔曳，今次換勞愛德操刀，話唔定爆得。另一冷馬推介第五場「搏得威」，上場跑谷草一哩只係輸條頸，10歲馬唔會有保留，轉場一定砌盡。

任達華