馬主論戰

港陌

電訊巨星諗得過

　　我哋隻「電訊巨星」同「電訊高星」有份上陣，前駒上場響田草1200米跑第七，已經熱身開氣，今次轉嚟跑谷草1200米，換馬偉昌操刀或者會有唔同發揮，希望會有好表現，冷冷哋諗得過。
另外鍾意第五場「滙名燈」，上場谷草1000米小試牛刀都跑第四，今次回師以往四戰非勝即位嘅谷草1200米，吼準盃賽場合先至上陣，一定砌盡。

張敬山

勁勇士喜遇弱旅

　　大摩近期攻勢一浪接一浪，話咁快已追過方嘉柏，上到練馬師榜首位，今晚摩廐都有惡馬，鍾意第五場「勁勇士」，上場輸畀實力超級嘅「文武維揚」無話可說，今次對手冇咁強，就算負重磅都夠贏。

　　另外第四場「高歡」都要留意，上場畀一早墮馬嘅「駕世仔」影響咗走勢，可以當冇跑過，今次繼續負輕磅，話唔定贏得。

任達華

蔡約翰精彩生輝

　　剛啱蔡約翰憑「活力奔騰」同「川河勁駒」起孖，搏殺手風好順，我睇好佢今晚仲有馬贏。先推介第七場「精彩生輝」上場季內初出跑谷草1200米，慢閘之下最終都追入一席第四，熱身後今次縮程跑1000米，信賴蔡約翰嘅部署，一於捧場。

　　另外推介尾場「精算攻略」，上場跑二班賽都上名，今次落番嚟三班跑有級數之利，配韋達就更加似樣。

寇鴻萍、梁廷鏘