洪禮賢講馬：勁飛寶 後上殺晒

猪拉多纳

　　第九場二班1400米。「飛銀動力」在港跑4場，只得1場跑得比較唔好，事後睇番嗰場，未必係賽事形勢或能力問題，好大程度係地慢影響。

　　上場地快即刻上到名，就算沿路三四叠，拉士仍有幾強纏鬥力，唔夠忽然神勇嘅「騰雲駕霧」衝刺，那個第三名好似水準普通，但唔好唔記得，後駒前中段有「飛銀動力」作為遮擋對象，形勢好得多，而臨尾兩駒所負距離有限，可知「飛銀動力」末段有幾韌；今仗繼續跑1400米，路程熟到爛，講到形勢方面，又可能會比前理想，因同場除咗「奪寶」外，冇咩馬係會明顯擺前走，希望8檔嘅佢，跟前但唔使又外叠，而喺利於前置跑法嘅C+3欄，更令威力增強。

　　第十場三班1400米。「勁飛寶」初出1200米輸條毛，翌仗加程又係輸少少，兩役對住「甜將」都冇運行，追又追唔切，放又畀人過，真係冇晒符，但佢連續兩場喺拉士展示強頑鬥心，就算轉跑法仍無損嗰段後勁，證明佢嘅可塑性真係幾大，同埋前景唔會差得去邊。

　　跑完上場暫時唔再加程或跑短，停留在1400米，意味着目前以此程最有把握；雖然10檔唔知韋達會點處理，如果因應有數駒會走，而肯用番留住衝跑法，以佢嘅後勁，要贏番場唔係難。