洪禮賢講馬：早買瞓唔着？遲買有得着？

港陌

　　賽馬這玩意，如果可以時間回撥，有預視超能力，梗係冇得頂！明知會命中嗰場Ｑ，事前仲唔有幾大買幾大，傾家蕩產又如何，真係押埋under也在所不計，但back to the future只會在電影中出現，所以，前程未卜之前，買得大，贏得大，只係一半半，純粹事後呻吓還可以：「哎呀，呢隻冷Ｗ中得一舊，早知買夠1Ｋ啦！」

　　正如日前報道，韋達喺啱啱日賽，隔夜騎師王賠率捧到得1.33倍，到咗賽日，由於頭幾場1Ｐ都冇，玩馬場失蹤記，攪到走地賠率不斷冷卻，一度好分到3個開有多。如果喺嗰刻至「入市」嘅馬友，較諸隔夜已下注嗰批人，回報差天共地。咁究竟係早買瞓唔着？抑或遲買有得着？都係嗰句老掉牙明言：「早知冇乞兒！」

　　中馬嘅時候嫌買得細，或買早咗。輸嗰陣就插自己，連死馬都「樁」個頭埋去。如果我們具有趨吉避凶能力，人人都係馬神！可惜與生俱來，我們只有勇於探求事實嘅勇氣，並冇預測到未來嘅福氣，所以，根本冇得我哋去呻笨。

　　對於今期嘅「伽羅」，點解唔跑剛賽新勝嘅路程1400米，係讓路畀「高一線」，定係特登有咁嘅安排，好難一口咬定。但見上場仍然係留得口擘擘，一樣贏得易，或者跟前咗，比留得較後更切合性能；本身喺外地贏過細場，估計谷草未必唔啱，總之早已指出佢唔係三班馬，分數仍在7字頭，繼續追「落後」。