洪禮賢講馬：年度盛事應該撐

魑魅魍魉

　　日前收到馬會CEO應家柏先生的感謝信（一式兩份fax埋，確保收到，夠細心），文中大意指敝報在國際賽前後的報道，令讀者緊密連繫這項年度盛事，他衷心感謝敝報的努力。

　　其實，作為一名香港人，在這項世界年度盛事，能作出一點綿力係福份，由當年邀請賽「飛躍舞士」鬥「鑽中寶」，到今屆「締造美麗」，自己睇咗好多屆國際賽，數一數，廿年有多。

　　加上，身為業內人士，對於令我們港人值得驕傲的體壇項目也不重視，似乎有點不稱職。就算會方有冇廣告贊助（問心嗰句，希望愈多愈好！），加大篇幅報道，讀者多點了解外隊實力，在投X或觀賞時，必會更投入。

　　正如黎視帝話齋：「人生有幾多個10年？」。自己當年無無聊跟友人去睇晨操，時為92年，到依家眨眨眼就嚟兩個10年，雖則比起好多前輩，我嘅年資濕碎到唔恨，但已佔去自己人生一半日子了！對於這行業點會冇感情，盛事當前，做番啲嘢係正確態度。在此謹向CEO回敬一句：「thank you」。希望來年國泰航空香港國際賽，繼續辦得有聲有色，又有大批世界名駒來港獻技，讓我們再開眼界。

　　第七場出馬唔多，但唔覺形勢一字咁淺，「曬冷王」係咪再Ｗ，好大程度要問問蔡廐戰駒，如「幸運勁」和「風力威猛」，一對馬月中試大閘走勢吸引，千祈唔好以為近績普通，就睇佢哋唔起。最後，謹祝讀者們X’mas。

洪禮賢　馬會賽馬節目主持